Kasafin 2025: Karamar Hukumar Kajuru Ta Ware Naira Miliyan 225 Don Siyan Motoci Ga Shugabanta, Mataimakinsa Da Sakatare

Karamar Hukumar Kajuru da ke Jihar Kaduna ta bayyana cewa za ta kashe Naira miliyan 225 don siyan motoci ga Shugaban Karamar Hukumar da Mataimakinsa a kasafin kudin shekarar 2025. Wannan na daga cikin kasafin kudin kananan hukumomin Jihar Kaduna na shekarar 2025 mai taken “Ci gaba da Sauya Yankunan Karkara Domin Ingantaccen Ci Gaba.”

A cewar bayanan kasafin kudin, an ware kudaden ne don sayen motoci ga shugabannin karamar hukumar domin sauƙaƙa gudanar da ayyukansu na yau da kullum. Bayan haka, kasafin ya nuna cewa an ware Naira miliyan 40 don siyen motoci ga DAF,DDF, DDB, E.S, DPHC, DWORKS, DESD.

Bayanai Kan Kasafin Kudaden Sayen Motoci:

LG Code: 31820400

Fund’l. Code: 70451

Programme Code: 131001

Fund Code: 09304

Economic Code: 23010105

Kudin: Naira miliyan 225

Abin da za a yi: Siyan motoci ga Shugaban Karamar Hukuma, Mataimakinsa da Sakatare

Idan aka kwatanta da kasafin shekarar 2024, wanda aka ware Naira miliyan 20 don siyan motoci ga shugabannin karamar hukumar, sabon kasafin na 2025 ya nuna ƙaruwa kudi da kashi 1025%.

Shin Kasafin Kudaden Zai Zama Gaskiya?

A matsayinsa na tsarin kasafin kudi, ba wai dukkan abubuwan da aka lissafa za a aiwatar da su kai tsaye ba. A cewar dokokin gudanar da kasafin kudi, sai idan gwamnati ta samu kudaden da ake bukata, sannan za a aiwatar da tanadin da ke cikin kasafin.