Kagarko: An hana noma a gefen hanya da shuke-shuke masu tsawo saboda tsaro

Shugaban karamar hukumar Kagarko da ke jihar Kaduna, Hon. Muhuyideen A. Umar, ya jagoranci taron tsaro tare da jami’an tsaro da shugabannin al’umma domin duba halin tsaro a yankin.

A cikin matakan da aka dauka bayan taron, an:

Haramta noma a gefen hanya, musamman a hanyar Jere zuwa Kurmin Jibrin, saboda yana hana ruwa bi ta magudanan ruwa.

Haramta shuke-shuke masu tsawo a cikin gari, saboda ana amfani da su a matsayin maboyar masu aikata laifi.

Bukaci manoma su kare hanyoyin kiwo (labi) don saukaka zirga-zirgar makiyaya.

Gargadi jama’a su kula da layukan wutar lantarki, duba da aikin dawo da hasken lantarki da ake yi a wasu yankuna.

Shugaban ya ce hadin kan al’umma da hukumomi na da matukar muhimmanci wajen tabbatar da zaman lafiya a Kagarko.