Gwamna Uba Sani Ya Gargadi Shugabannin Gargajiya Kan Mamaye Filaye Ba Bisa Ka’ida Ba

Gwamnan Jihar Kaduna, Malam Uba Sani, ya yi gargaɗi mai ƙarfi ga shugabannin gargajiya, yana mai bukatar su dakatar da mamaye filaye ba bisa ka’ida ba domin tabbatar da zaman lafiya a cikin al’ummomi daban-daban na jihar.

Gwamnan ya yi wannan gargaɗi ne yayin Gaisuwar Sallah a fadar Mai Martaba Sarkin Zazzau, Malam Ahmed Nuhu Bamalli, a ranar Talata.

A yayin jawabinsa, wanda Alhaji Muktar Shehu, mai bai wa gwamna shawara na musamman kan al’amuran gargajiya, ya wakilta, Gwamna Sani ya bayyana cewa gwamnati tana karɓar ƙorafe-ƙorafe da dama kan yadda wasu dagatai da masu unguwanni ke mamaye filaye ba bisa ƙa’ida ba. Ya nanata cewa dukkan filaye mallakar gwamnati ne, kuma wajibi ne a bi matakan da suka dace wajen mallakar su don tabbatar da zaman lafiya da tsaro.

Bukatar Zaman Lafiya da Bin Ka’ida

Gwamnan ya yi kira ga shugabannin gargajiya da su tabbatar da kiyaye zaman lafiya a yankunansu, domin ci gaba da samar da cigaba. Haka kuma, ya buƙaci manoma da su koma gonakinsu, yana mai jaddada cewa yanayin tsaro a sassan jihar ya inganta sosai.

Shawarwarin Sarkin Zazzau

A nasa bangaren, Mai Martaba Sarkin Zazzau, Malam Ahmed Nuhu Bamalli, ya sake jaddada umarninsa ga hakimai, dagatai, da masu unguwanni da su guji nuna danniya ga jama’arsu. Har ila yau, ya gargaɗe su da su kauce wa haɗin gwiwa da masu hakar ma’adanai ba bisa ka’ida ba a yankunansu.

Sarkin ya bayyana cewa kafin a fara kowace irin hako ma’adanai, dole ne a tabbatar da sahihancin aikin ta hannun hukumomin da abin ya shafa, tare da sanar da masarauta. Haka kuma, ya gargaɗi shugabannin yankuna da su guji mamaye filayen da aka tanada wa Ma’aikatar Gandun Daji, inda ya nanata cewa ya kamata shugabanni su kula da kadarorin masarauta kawai.

Hukunci Ga Masu Take Doka

Sarkin ya sake jaddada cewa dukkan filaye mallakin gwamnati ne, kuma duk wanda aka samu yana mamaye su ba bisa ƙa’ida ba, zai fuskanci hukunci mai tsanani. Bugu da ƙari, ya tunatar da masu rike da sarautun gargajiya waɗanda ke da mukamai biyu da su yi murabus daga ɗaya, kamar yadda gwamnatin jiha ta umarta, ko kuma su fuskanci sauke su daga mukami da hukunci daga hukumomin da suka dace.

A ƙarshe, Sarkin ya yi kira ga shugabannin gargajiya da su haɗa kai, su inganta zumunci, tare da yin aiki tukuru don ci gaba da tabbatar da zaman lafiya da kwanciyar hankali a jihar Kaduna.