El-Rufai Ba Shi Da Rijista a Jam’iyyarmu – SDP Kaduna

A ranar Juma’a, 28 ga Maris, 2025, jam’iyyar Social Democratic Party (SDP) reshen Jihar Kaduna ta bayyana cewa tsohon gwamnan jihar, Malam Nasir El-Rufai, ba mambanta ba ne, domin babu wani rajista da ke nuna hakan a ofishin jam’iyyar.

Mataimakin Sakataren Ƙasa na jam’iyyar SDP mai kula da shiyyar Arewa maso Yamma, Idris Inuwa, shi ne ya bayyana hakan yayin wata ganawa da manema labarai a Kaduna. Ya ce, “Mun samu rahoton cewa ana rade-radin Malam Nasir El-Rufai ya shiga jam’iyyar SDP. Amma, bisa binciken da muka yi, babu wata shaida da ke nuna cewa ya yi rijista da jam’iyyarmu, ko a ofishin Kaduna North ko a mazabar Unguwar Sarki.”

Ya ci gaba da cewa, idan El-Rufai da duk wani mutum na son zama ɗan jam’iyyar SDP, akwai tsari da dole ne a bi. “Duk wanda ke sha’awar shiga jam’iyyarmu, ya kamata ya bi matakan da suka dace kamar yadda dokokin SDP suka tanada,” in ji shi.

Wannan bayani na zuwa ne bayan da El-Rufai ya sanar da ficewarsa daga jam’iyyar APC zuwa SDP a ranar 10 ga Maris, 2025. Duk da haka, SDP ta Kaduna ta jaddada cewa har yanzu tsohon gwamnan bai zama cikakken mambanta ba, domin bai bi matakan rajista da ake bukata ba.

Bugu da ƙari, Inuwa ya yi watsi da rahotannin da ke cewa an rusa shugabancin jam’iyyar SDP a Kaduna, yana mai cewa hakan ba bisa ƙa’ida ba ne. “Shugabannin jam’iyyar SDP na Kaduna sun fito ne daga zaɓe na gaskiya da aka gudanar, kuma suna da wa’adin mulki na shekaru huɗu da har yanzu yake kan aiki,” in ji shi.

A ƙarshe, ya nanata cewa SDP na da buɗaɗɗiyar ƙofa ga duk wanda ke son shiga, amma sai ya bi ƙa’idojin jam’iyyar.